Fréttasafn

Unnið er nú að því að bæta aðstöðu knattspyrnuiðkenda á sparkvellinum við íþróttamiðstöðina. Lítill götusópur hefur farið yfir völlinn í þeim tilgangi að sópa upp kurlinu sem hefur reynst mörgum þreytandi. Með því að sópa völlinn og þrífa er vonast til þess að losna við eða draga úr þeirri svertu sem berst í föt knattspyrnuiðkenda.

Heilsuefling 60+ hefst á ný þriðjudaginn 6. september eftir sumarfrí. Fyrsti tími fer fram í íþróttahúsinu kl. 12:30-13:30. Áhugasömum íþróttaiðkendum er bent á facebooksíðu heilsueflingar 60+. En þar má finna tímatöflu og allar helstu upplýsingar.

Helga Guðjónsdóttir atvinnuráðgjafi SSV, Sigursteinn Sigurðsson menningarfulltrúi SSV og Margrét Björk Björnsdóttir fulltrúi áfangastaða- og markaðsstofu Vesturlands verða í Ráðhúsinu í Stykkishólmi þriðjudaginn 6. september kl. 16:00 – 18:00. Áhugasamir eru hvattir til að nýta sér þjónustu þeirra.

Ný og uppfærð vefsíða sameinaðs sveitarfélags Stykkishólmsbæjar og Helgafellssveitar hefur nú verið tekin í gagnið. Með nýrri síðu er leitast eftir því að upplýsingar verði aðgengilegri, viðmót auðveldara og nýjar veflausnir nýttar. Fundargerðir eru nú felldar inn í síðuna og notendum gefin kostur á að vakta málsnúmer. Síðan er unnin upp úr gömlu vefsíðu Stykkishólmsbæjar og á víða eftir að uppfæra texta í kjölfar sameiningar Stykkishólmsbæjar og Helgafellssveitar en það verður gert þegar nafn nýja sveitarfélagsins liggur fyrir.

Félags- og skólaþjónusta Snæfellinga auglýsir laust til umsóknar starf forstöðumanns Ásbyrgis, hæfingar - og vinnustöðvar fólks með skerta starfsgetu. Laun eru samkvæmt kjarasamningi Sambands íslenskra sveitarfélaga og viðkomandi stéttarfélags. Skriflegar umsóknir um starfið er tilgreini menntun, starfsferil og umsagnaraðila ásamt prófskírteini og sakavottorði berist Sveini Þór Elínbergssyni, forstöðumanni Félags- og skólaþjónustu Snæfellinga, sem jafnframt veitir frekari upplýsingar

Föstudagurinn 12. ágúst síðastliðinn var síðasti vinnudagur sumarsins hjá vinnuskólanum. Af þvi tilefni var ungmennum komið á óvart og boðið á kayak, farið í leiki og grillað í lok dags.

Menningarhátíðin Norðurljósin verður haldin í sjötta sinn í Stykkishólmi dagana 20. - 23. október 2022. leitað er að aðilum sem hafa áhuga á að standa fyrir viðburðum, sýningum, skemmtunum og gjörningum, hvort heldur sem eru einstaklingar, skólar, félagasamtök eða fyrirtæki. Einnig eru þeir sem hafa hugmyndir eða áhuga á að koma sér eða öðrum á framfæri hvattir til að hafa samband við nefndina.

Skólinn verður settur miðvikudaginn 24. ágúst á Amtsbókasafninu sem hér segir: 1. - 7. bekkur kl. 10 8. - 10. bekkur kl. 11

Vakin er athygli íbúa í Nestúni á kynningarfundi sem fram fer í Amtsbókasafninu kl. 17 í dag, miðvikudag. Bæjarstjórn samþykkti á 2. fundi sínum afgreiðslu skipulagsnefndar um að grenndarkynna byggingaráform Asco Harvester ehf. við Nesveg 22A fyrir lóðarhöfum við Nesveg 20, 20a og 24. Auk grendarkynningar var samþykkt að halda kynningarfund fyrir íbúa í næsta nágrenni svo hægt sé að upplýsa þá og svara spurningum og athugasemdum þeir íbúar kunna að hafa varðandi áform Asco Harvester. Aðrir íbúar sem telja að umrædd byggingaráform geti haft áhrif á þeirra hagsmuni, eru að sjálfsögðu velkomnir á fundinn.

Lausar stöður við Grunnskólann í Stykkishólmi - stuðningsfulltrúi og skólaliðar ?