Fréttasafn

Vakin er athygli á að nú hefur verið opnað fyrir umsóknir í Lóu, nýsköpunarsjóð sem ætlaður er nýsköpunarverkefnum á landsbyggðinni. Sjóðurinn er í höndum Háskóla-, iðnaðar- og nýsköpunarráðuneytisins. Áherslur Lóu árið 2023 eru verkefni sem komin eru af byrjunarstigi og tengjast samfélagslegum áskorunum á borð við loftslagsmál, sjálfbærni í heilbrigðis- og menntamálum og sjálfbærni í matvælaframleiðslu.

Opinn kynningarfundur verður haldinn miðvikudaginn 8. mars, kl. 17:00-18:00 á Amtsbókasafninu í Stykkishólmi. Á fundinum gera Kristín Þorleifsdóttir, skipulagsfulltrúi og Bæring Bjarnar Jónsson, skipulagsráðgjafi, grein fyrir vinnu vegna deiliskipulags hafnarsvæðis við Skipavík.

Félag atvinnulífs í Stykkishólmi stendur fyrir glæpa- og draugahátíð sem haldin verður í fyrsta sinn komandi helgi. Dagskrá hátíðarinnar er þétt en meðal annars er morðgáta sem gestir hátíðarinnar geta spreytt sig á yfir helgina, ekki ósvipað ratleik. Í boði verður að skoða draugahús, þar sem Dagrún Jónsdóttir þjóðfræðingur segir frá draugum og þeim ólíku gerðum drauga sem finnast á Íslandi, líkt og uppvakninga, afturgöngur, útburði og fépúka. Hún kennir ýmis praktísk atriði eins og hvernig má þekkja drauga sem fólk mætir á förnum vegi, vekja upp draug og svo losna við drauga sem ásækja fólk. 

Fimmtudaginn 23. febrúar verða teknar upp senur fyrir kvikmyndina Snerting í Stykkishólmi. Kvikmyndað verður við Skólastíg 8 og þarf að loka Skólastígnum fyrir umferð um stund eftir hádegi vegna þessa. Þá verða einnig teknar upp senur á dvalarheimili aldraðra í góðu samstarfi við íbúa og starfsfólk. Fyrirtækið RVK Studios stendur fyrir tökum.

Leitað er að leiðtoga með mikinn metnað fyrir menntun barna og unglinga sem hefur framsækna sýn á skólastarf og hlutverk stjórnendateymisins við skólana og samvinnu þess. Lögð er áhersla á öfluga skólaþróun, hvetjandi starfsumhverfi fyrir nemendur og starfsfólk og samstarf við aðila skólasamfélagsins.

Sveitarfélagið Stykkishólmur auglýsir eftir forstöðumanni í nýtt starf til þess að veita forstöðu og leiða stofnun nýs sviðs öldrunar og stoðþjónustu í sveitarfélaginu og innleiðingu á stefnumörkun starfshóps um þjónustu við einstaklinga 60 ára og eldri. Með stofnun miðstöðvarinnar er fyrsta skrefið tekið við að vinna markvisst að því að samþætta félags- og heilbrigðisþjónustu, þ.m.t. félagslegrar og heilbrigðislegrar heimaþjónustu, hvíldarinnlagna, félagsstarfs og fleiri þjónustuþætti eldra fólks.

Tíundi fundur bæjarstjórnar Stykkishólms fer fram fimmtudaginn 23. febrúar kl. 17:00 í bæjarstjórnarsal.

Bæjarstjórn Sveitarfélagsins Stykkishólms auglýsir eftir styrkumsóknum frá einstaklingum og fyrirtækjum í samræmi við reglur um styrkveitingar. Markmiðið með styrkjum bæjarstjórnar er að styðja við sjálfsprottið starf, starfsemi frjálsra félagasamtaka og framtak einstaklinga sem stuðla að farsælli þróun samfélagsins, menningarlífs, lífsgæðum og fjölbreytilegu mannlífi og öflugu íþrótta- og æskulýðsstarfi.

Miðvikudaginn 22. febrúar rennur upp hinn sívinsæli Öskudagur, sem jafnan er mikið tilhlökkunarefni barna víðsvegar um landið. Dagurinn verður með hefðbundnu sniði í Stykkishólmi í ár.

Framkvæmdir standa nú yfir við Stykkishólmsveg, á milli Fákaborgar og Hamraenda. Greint var frá því á vef sveitarfélagsins að til stæði að taka veginn í sundur til að endurnýja rör sem hefur fallið saman og hleypa þannig vatninu sem safnast hefur upp sína leið.