Fréttasafn

Tryggingastofnun býður til fræðslufundar um umsóknir um ellilífeyrir hjá TR, miðvikudaginn 9. nóvember nk. kl.16.00 – 17.30 í Hlíðasmára 11, Kópavogi. Fundinum einnig streymt. Á fundinum verður farið yfir hvernig best er að standa að umsókn til TR um ellilífeyri, hvaða gögn þurfa að fylgja umsókn, réttindi og upphæðir greiðslna.

Íþrótta- og Ólympíusamband Íslands í samstarfi við Sundsamband Íslands stendur fyrir landsátaki í sundi frá 1. - 30. nóvember 2022. Syndum er heilsu- og hvatningarátak sem höfðar til allra landsmanna. Markmiðið með Syndum er að hvetja almenning til þess að hreyfa sig oftar og meira í sínu daglega lífi og nota meðal annars sund til þess.

Foreldrafélag Grunnskólans í Stykkishólmi stendur fyrir hrekkjavökugöngu og opnun á Húsi hinna framliðnu (Haunted house) fyrir þá sem þora miðvikudaginn 2. nóvember. Verkefnið vinnur foreldrafélagið í samstarfi við ungmenni í félagsmiðstöðinni og Norska húsið. 

Atvinnuráðgjafi, menningarfulltrúi og fulltrúi Áfangastaða- og Markaðsstofu Vesturlands verða með viðveru í Ráðhúsinu í Stykkishólmi þriðjudaginn 1. nóvember, kl. 13-16 þar sem boðið verður upp á opna viðtalstíma.

Úrskurðarnefnd umhverfis- og auðlindamála felldi í dag úr gildi byggingarleyfi fyrir Nesveg 22a, sem veitt var 14. október síðastliðinn. Nefndin telur að umrædd bygging sé ekki í samræmi við gildandi aðalskipulag og að deiliskipuleggja hefði þurft svæðið áður en byggingarleyfið var gefið út. Byggir niðurstaðan á því að í aðalskipulaginu sé gert ráð fyrir deiliskipulagningu núverandi hafnar- og athafnasvæða og á því að á engan hátt sé fjallað um hinu umdeildu byggingaráform í aðalskipulaginu. Felur niðurstaða úrskurðarnefndar jafnframt í sér ákveðna óvissu með fyrirhugaða uppbyggingu á nýúthlutuðum atvinnulóðum á Hamraendum þar sem orðalag aðalskipulagsins á jafnframt við um það svæði og málsmeðferð sveitarfélagsins vegna þeirra áforma byggði einnig á 1. mgr. 44. gr. skipulagslaga líkt og gert var í máli Asco Harvester ehf. Deiliskipulag á svæðinu er hins vegar í vinnslu og skipulagslýsing verður auglýst á næstu dögum. Sveitarfélagið mun funda með lóðarhöfum á Hamraendum á næstu dögum vegna málsins.

Fimmti fundur bæjarstjórnar Stykkishólmsbæjar og Helgafellssveitar fer fram fimmtudaginn 27. október kl. 17:00 í bæjarstjórnarsal.

Heilbrigðisstofnun Vesturlands Stykkishólmi óskar eftir að ráða sjúkraflutningamenn á bakvaktir og til útkalla. Viðkomandi þarf ekki að hafa lokið formlegu námi í sjúkraflutningum en þarf að hafa áhuga og vilja til að sinna því námi meðfram stafinu.

Í október býður innviðaráðuneytið, í samvinnu við landshlutasamtök sveitarfélaga, íbúum í öllum landshlutum til opins samráðs á fjarfundum undir yfirskriftinni Vörðum leiðina saman. Fundur fyrir íbúa Vesturlands verður haldinn miðvikudaginn 26. október kl. 15-17.

Lóðin Aðalgata 16 er hér með auglýst til úthlutunar í samræmi við reglur Stykkishólmsbæjar um úthlutun á lóðum fyrir íbúðar- og atvinnuhúsnæði og bætist hún þar með á úthlutunarlista yfir lausar lóðir í Stykkishólmi. Umsóknarfrestur er til 29. október 2022.

Hin árlega hundahreinsun fer fram með nýju sniði í ár. Í stað þess að boða alla hunda í hreinsun sama daginn líkt og undanfarin ár mun Dýralæknamiðstöð Vesturlands hafa samband við eigendur skráðra hunda og bjóða þeim að bóka stuttan tíma. Auk hundahreinsunar yrði þá boðið upp á snögga heilsufarsskoðun og hundaeigendum gefst tækifæri til að spyrja spurninga og fá ráðgjöf varðandi sína hunda ef þess þarf. Þeim sem ekki hugnast þetta yrði þá boðið að koma einungis fyrir ormalyfjagjöfina.