Fréttir

Opinn rafrænn samráðsfundur var haldinn af samstarfsnefnd um sameiningu Helgafellssveitar og Stykkishólmsbæjar í gær, þriðjudaginn 21. desember, fyrir íbúa Stykkishólms. Sambærilegur fundur fór fram með íbúum Helgafellssveitar síðastliðinn föstudag. Markmið fundanna var að kynna verkefnið sem liggur fyrir sveitarfélögunum og heyra spurningar, ábendingar og sjónarmið íbúa áður en lengra er haldið.

Hefð hefur skapast í Hólminum fyrir friðargöngu á Þorláksmessu sem er fastur liður hjá mörgum í aðdraganda jólanna. Í ljósi aukinna smita á landinu hefur hefðbundinni firðargöngu verið aflýst en þess í stað eru bæjarbúar hvattir til að fara í sína eigin friðargöngu hver fyrir sig eða kveikja á kyndli fyrir utan heimili sitt kl. 18.00 á Þorláksmessu og fá sér jafnvel bolla af heitu súkkulaði með rjóma eða öðrum bragðbæti.

Á 402. fundi sínum 30. september s.l. samþykkti bæjarstjórn Stykkishólmsbæjar að auglýsa tillögu að deiliskipulagi fyrir Súgandisey skv. 1. mgr. 41. gr. skipulagslaga nr. 123/2010. Markmiðið með tillögunni er að móta ramma fyrir göngu- og náttúruupplifun á eyjunni og tryggja jafnframt öryggi sjófarenda með sjótengdum mannvirkjum. Skipulagstillagan byggir á núverandi aðstæðum og niðurstöðum úr hugmyndasamkeppni um skipulag og hönnun útsýnisstaðar á eyjunni.

Verulegur jákvæður viðsnúningur verður í rekstri Stykkishólmsbæjar strax á næsta ári samkvæmt samþykktri fjárhagsáætlun Stykkishólmsbæjar 2022 og þriggja ára áætlun 2023-2025, gangi áætlanir eftir. Er um að ræða öfluga viðspyrnu í rekstri sveitarfélagsins, m.a. vegna sölu fastafjármuna í tenglum við áform um uppbyggingu nýrra félagslegra íbúða, eftir að mikilla áhrifa gætti í starfsemi og rekstri sveitarfélagsins vegna Covid-19 veirunnar, þó svo áfram sé gert ráð fyrir áhrifum hennar í áætlunum.

Samstarfsnefnd um sameiningu Helgafellssveitar og Stykkishólmsbæjar, boðar til samráðsfunda um verkefnið og það sem framundan er. Fyrirhugað er að kjósa um sameiningu sveitarfélaganna í mars á næsta ári. Samráð við íbúa Helgafellssveitar fer fram föstudaginn 17. desember en samráð við íbúa Stykkishólmsbæjar fer fram á rafrænum fundi þriðjudaginn 21. desember.

Nú er komið að því ! Jólalest Tónlistarskóla Stykkishólms ekur um bæinn á milli kl. 17 og 18 í dag, þriðjudaginn 14. desember, og spilar á völdum stöðum til að gleðja gesti og gangandi með jólatónlist. Með í för verða jólasveinar með jólasleðann góða sem þeir afhentu bæjarbúum fyrir síðustu jól en nú er kominn tími til að koma honum fyrir á góðum stað til að gleðja bæjarbúa.

Auglýst var eftir styrkumsóknum frá einstaklingum og fyrirtækjum í samræmi við reglur Stykkishólmsbæjar um styrkveitingar frá 27. september til 4. október sl. Alls bárust 11 umsóknir. Bæjarráð fjallaði um málið á fundi sínum 2. desember síðastliðinn og lagði til úthlutun sem bæjarstjórn samþykkti á fundi sínum 9. desember. Styrkúthlutun var sem hér segir.

Opnað hefur verið fyrir umsóknir í lista- og menningarsjóð Stykkishólmsbæjar. Samkvæmt reglum sjóðsins er hlutverk hans meðal annars að styðja og styrkja lista og menningarstarf í Stykkishólmi og hvetja til nýsköpunar á sviði lista og menningar.

Tekin hefur verið sú varúðarráðstöfun að fresta jólalest Tónlistarskóla Stykkishólms sem til stóð að aka um bæinn í dag, 8. desember, sökum þess að upp hefur komið eitt covidsmit í Stykkishólmi. Er það gert til þess að gæta fyllstu varúðar. Fólk er beðið um að vera meðvitað um stöðuna og efla sínar persónubundnu sóttvarnir.

Jólalest Tónlistarskóla Stykkishólms ekur um bæinn á milli kl. 18 og 19 miðvikudaginn 8. desember og spilar á völdum stöðum til að gleðja gesti og gangandi með jólatónlist. Með í för verða jólasveinar með jólasleðann góða sem þeir afhentu bæjarbúum fyrir síðustu jól en nú er kominn tími til að koma honum fyrir á góðum stað til að gleðja bæjarbúa.