Fréttasafn

Þann 18. apríl sl. samþykkti bæjarstjórn sveitarfélagsins Stykkishólms að auglýsa tillögu að nýju deiliskipulagi fyrir hafnarsvæðið við Skipavík skv. 1. mgr. 41. gr. skipulagslaga nr. 123/2010. Deiliskipulagsvæðið tekur til um 4,5 ha reits, sem í aðalskipulagi er að mestu skilgreindur sem hafnarsvæði. Helstu markmið deiliskipulagsins eru að skilgreina skynsamlega nýtingu núverandi innviða og framtíðarmöguleika til uppbyggingar á svæðinu

Sveitarfélagið Stykkishólmur óskar eftir að ráða tvo sundlaugarverði, eina konu og einn karl, til sumarafleysinga í íþróttamiðstöð Stykkishólms. Um er að ræða tímabundna 100% sumarafleysingu frá 15. maí til lok ágústmánaðar. Umsækjendur þurfa að hafa náð 18 ára aldri.

Rafskútuleigan Hopp opnaði þjónustu sína í Stykkishólmi í dag, en Hopp býður upp á skammtímaleigu á rafskútum/rafdrifnum hlaupahjólum. Markmið sveitarfélagsins með þessu er að auðvelda íbúum og gestum að komast ferða sinna með umhverfisvænum hætti. 

Sumardagurinn fyrsti verður haldinn hátíðlegur um land allt fimmtudaginn 20. apríl 2023. Byggðasafn Snæfellinga og Hnappdæla mun standa fyrir fuglabingói fyrir börn í tilefni þess að nú stendur yfir ljósmyndasýningin Fuglar á Snæfellsnesi eftir Daníel Bergmann. Einnig verður boðið upp á ratleik sem hefst við Norska húsið. Ratleikur og bingó hefjast kl. 13:00.  Að loknum ratleik verður boðið upp á grillaðar pylsur við Norska húsið.

12. fundur bæjarstjórnar Stykkishólms fer fram fimmtudaginn 18. apríl kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Svæðisgarðurinn Snæfellsnes í samstarfi við Þjóðgarðinn Snæfellsjökul bjóða til málþings í nýju Þjóðgarðsmiðstöðinni á Hellissandi miðvikudaginn 12. apríl 2023. Málþingið verður á ensku, en meðal fyrirlesara og gesta eru sérfræðingar að utan. Til umfjöllunar verður UNESCO Man and Biosphere (MAB) verkefni á vegum Sameinuðu þjóðanna. MAB svæði búa yfir náttúruminjum og vistkerfum sem hafa mikla sérstöðu og alþjóðlegt verndargildi. Drifkraftur einkennir samfélagið á Snæfellsnesi sem vill áfram vera leiðandi á sviði samstarfs og umhverfismála. Málþinginu verður streymt og verður aðgengilegt á vefnum eftir á.

Fimmtudaginn 30. mars sl. mætti í Hólminn Benjamin Mokry frá Klifurhúsinu Reykjavík til að kynna íþróttakennara Grunnskólans fyrir notkun á fallvarnarblökkum, sjálfvirkum búnaði sem tryggir öryggi klifrara í klifurvegnum. Búnaðurinn var gjöf frá fyrirtækjunum Agustson, Sæfell og Þórsnes. Arnar Hreiðarsson forstöðumaður íþróttamannvirkja sá svo um að koma búnaðinum fyrir. Eru þessum aðilum færðar kærar þakkir fyrir þeirra framlag til klifurs í Stykkishólmi.

Kokteilahátíðin Stykkishólmur cocktail weekend verður haldin hátíðleg dagana 5.-8. apríl. Á hátíðinni keppa helstu barir og veitingastaðir bæjarins um að blanda besta kokteilinn. Allir staðirnir sem taka þátt munu bjóða upp á sinn keppnisdrykk yfir helgina á góðu verði, dómnefnd fer svo á milli staða og tilkynnir sigurvegarann á laugardagskvöldinu. Hægt er að taka þátt í happdrætti með því að safna límmiðum sem fást með keyptum drykk á hverjum stað. Dregið verður úr happdrættinu á Fosshótel Stykkishólmi á laugardagskvöldinu.

Verkefnið römpum upp Ísland er nú í fullum gangi. Nú á dögunum kom Atli Freyr Guðmundsson í Stykkishólm til að kanna þörf á römpum hjá einkafyrirtækjum í bænum. Í ferð sinni átti hann einnig fund með bæjarstjóra og fóru þeir félagar saman yfir aðgengismál hér í bæ. Að lokinni heimsókn Atla verða gerðar teikningar af þeim römpum sem fyrirhugaðir eru á svæðinu.

Á vefsíðu sveitarfélagsins Stykkishólms má lesa helstu fréttir sem snúa að rekstri sveitarfélagsins, viðburðum og öðru tengdu sveitarfélaginu. Fréttunum er svo deilt á facebooksíðu Stykkishólms til að ná athygli sem flestra. Nú hefur verið sett á fót tilraunaverkefni til að ná til þeirra sem nota ekki tölvur. Fram hefur komið ákall um að bæta þurfi upplýsingaflæði til þessa hóps. Margir upplifi sig ómeðvitaða um hvað er í gangi í samfélaginu og því full þörf á að bregðast við.