Fréttasafn

Í byrjun júnímánaðar hefjast upptökur á kvikmyndinni Woman at sea. Upptökur fara að mestu fram í Ólafsvík en einnig veður tekið upp í Stykkishólmi í byrjun júní, gert er ráð fyrir að upptökur á myndinni munu standa yfir í júní og júlí. Framleiðendur myndarinnar óska nú eftir aukaleikurum fyrir tökur í Stykkishólmi þann 1. júní nk.

Sveitarfélögin á Snæfellsnesi fagna EarthCheck umhverfisvottun 13. árið í röð ? til hamingju Snæfellingar! Með samtakamætti á Snæfellsnesi fyrir nær tveimur áratugum hófu sveitarfélögin á Snæfellsnesi ferli til að fá umhverfisvottun, eitt af þeim skrefum sem hafa verið tekin til að standa vörð um náttúru og samfélag á svæðinu.

Arkís arkitektar ehf. fyrir hönd Stykkishólmsbæjar óska eftir tilboðum í viðbyggingu við leikskólann í Stykkishólmi. Um er að ræða viðbyggingu við núverandi leikskóla sem er á einni hæð. Núverandi leikskóli er með þremur deildum og er nú verið að bæta við fjórðu deildinni. Verkefnið felst í því að fullbyggja nýju deildina að innan sem utan með innréttingum og öllum tilheyrandi frágangi og skila deildinni tilbúinni til notkunar.

Á bæjarstjórnarfundi þann 12. maí sl. var ársreikningur Stykkishólmsbæjar fyrir árið 2020 samþykktur við síðari umræðu, en ársreikningurinn ber merki þess að síðasta ár var óvenjulegt vegna þess faraldurs sem við sem samfélag höfum verið að takast á við ásamt öðrum þjóðum. Rekstrartekjur samkvæmt ársreikningi fyrir A og B hluta námu 1.698,5 millj. kr. á árinu en þar af námu rekstrartekjur A hluta 1.322,6 millj. kr. Rekstrarniðurstaða A og B hluta var neikvæð um 74,6 millj. kr. en fjárhagsáætlun með viðaukum hafði gert ráð fyrir neikvæðri rekstrarniðurstöðu að fjárhæð 78,4 millj. kr.

Félags- og skólaþjónusta Snæfellinga auglýsir starf við heimaþjónustu í Stykkishólmi laust til umsóknar. Stöðugildi er 30% og er umsóknarfrestur til og með 28. maí nk. Nánari upplýsingar um starfið veitir Brynja Mjöll, yfirumsjónarmaður heimaþjónustu, í síma: 430 7800, netfang: brynja@fssf.is

Bæjarstjórn Stykkishólmsbæjar samþykkti á fundi þann 12. maí 2021 að auglýsa tillögu að nýju deiliskipulagi samkvæmt 1. mgr. 41. gr. skipulagslaga nr. 123/2010. Reiturinn er um 1,7 ha að stærð og er skilgreindur sem íbúðasvæði, miðsvæði og athafnasvæði í Aðalskipulagi Stykkishólms 2002-2022 m.s.br. Svæðið afmarkast af Víkurgötu og Aðalgötu til vesturs, Austurgötu til norðurs og lóðarmörk húsa sem standa við Skúlagötu til austurs. Markmið skipulagstillögunnar er að skilgreina nýjar lóðir og byggingarreiti sem styrkja gömlu byggðina og þá fallegu bæjarmynd sem fyrir er í Stykkishólmi.

Bæjarstjórn Stykkishólmsbæjar kynnir hér með, í samræmi við 2. mgr. 30. gr. skipulagslaga, tillögu að aðalskipulagsbreytingu um gististaði á íbúðasvæðum í Stykkishólmsbæ. Í tillögunni er skilgreint hvaða gististaðir geta talist minniháttar atvinnustarfsemi sem samrýmist getur búsetu á íbúðarsvæðum, sbr. gr. 4.3.1 og gr. 6.2 í skipulagsreglugerð.

Lausar stöður við Grunnskólann í Stykkishólmi

Í starf aðstoðarskólastjóra Grunnskólans í Stykkishólmi var ráðin Þóra Margrét Birgisdóttir og í starf deildarstjóra Tónlistarskóla Stykkishólms var ráðinn Kristjón Daðason. Þau munu taka til starfa 1. ágúst 2021.

Auglýst er eftir annars vegar sviðsstjóra umhverfis- og skipulagsmála til að stýra nýstofnuðu sviði og leiða þróun umhverfis-, skipulags- og byggingarmála og yfirstjórn verklegra framkvæmda samstarfssveitarfélaganna og hins vegar sérfræðingi á sviði byggingar- eða skipulagsmála sem verður staðgengill sviðsstjóra og þátttakandi í uppbyggingu sviðsins.