Fréttasafn

Í tilefni af 30 ára afmæli Danskra daga í ár verður efnt til uppboðs laugardaginn 17. ágúst. Ágóði uppboðsins rennur til styrktar góðra málefna. Tekið er fram að ekki er um að ræða uppboð Aksjón Lionsmanna sem naut mikilla vinsælda á árum áður, heldur hefur góður hópur hér í Hólminum ákveðið að endurvekja þennan skemmtilega viðburð í tilefni afmælisins.

Danskir dagar eru ein elsta bæjarhátíð landsins og hafa verið haldnir frá árinu 1994. Í ár á hátíðin því 30 ára afmæli og af því tilefni verður blásið til afmælishátíðar dagana 15. - 18. ágúst. Á hátíðinni verður boðið upp á brot af því besta frá dagskrá hennar síðustu 30 ár.

Sigríður Silja Sigurjónsdóttir hefur verið ráðin aðstoðarskólastjóri Grunnskólans í Stykkishólmi. Sigríður Silja er með meistarabréf í kennslufræðum frá Háskólanum á Akureyri, B.sc. gráðu í viðskiptalögfræði frá Háskólanum á Bifröst og diplómu í opinberri stjórnsýslu frá Háskóla Íslands. Hún hefur störf 1. ágúst en þá tekur einnig Þóra Margrét Birgisdóttir við stöðu skólastjóra. Áður hafði Þóra Margrét gengt stöðu aðstoðarskólastjóra.

Þann 24. apríl 2024, samþykkti bæjarstjórn Sveitarfélagsins Stykkishólms að auglýsa tillögu að breytingu á Aðalskipulagi Helgafellssveitar 2012-2024 og tillögu að deiliskipulagi fyrir Vigraholt í samræmi við 1. mgr. 31. gr. og 1. mgr. 41. gr. skipulagslaga nr. 123/2010 að undangenginni yfirferð Skipulagsstofnunar fyrir auglýsingu.

Sundlaugin í Stykkishólmi verður lokuð föstudaginn 19. júlí nk. vegna námskeiðs starfsfólks. Beðist er velvirðingar á þeim óþægindum sem þetta kann að valda. Opnum sundlaugina hins vegar aftur, með vaska endurþjálfaða starfsmenn, klára á bakkanum, laugardaginn 20. júlí nk. kl. 10:00.

26. fundur bæjarstjórnar Stykkishólms fer fram fimmtudaginn 27. júní kl. 17:00 í bæjarstjórnarsal. Smelltu á hnappinn hér að neðan til að kynna þér dagská fundar.

Skotthúfan fer fram í Stykkishólmi laugardaginn 29. júní 2024. Þjóðbúningahátíðin Skotthúfan hefur fest sig í sessi hér í Hólminum og setur hún fagran brag á annars fallegan bæ þegar áhugafólk af öllu landinu heimsækir Stykkishólm í sínu fínasta pússi. Byggðasafn Snæfellinga- og Hnappdæla hefur veg og vanda að hátíðinni og hefur fóstrað hana frá fyrstu tíð í Norska húsinu, elsta tvílyfta timburhúsi á Íslandi. Fyrsti þjóðbúningadagurinn í Norska húsinu var haldinn 2005 og nafnið Skotthúfan tekið upp árið 2014. Síðan hefur verið bryddað upp á fyrirlestrum, tónleikum, smiðjum og balli í dagskránni og hefur við það myndast skemmtileg stemning meðal gesta. 

Lóðin Hjallatangi 48 eru hér með auglýst til úthlutunar í samræmi við reglur Stykkishólms um úthlutun á lóðum fyrir íbúðar- og atvinnuhúsnæði og bætast þar með á úthlutunarlista yfir lausar lóðir í Stykkishólmi. Umsóknarfrestur er til og með 5. júlí 2024.

Þann 30. nóvember 2023, samþykkti bæjarstjórn Sveitarfélagsins Stykkishólms tillögu að breyt­ingu á deiliskipulaginu „Víkurhverfi“ í samræmi við 1. mgr. 41. gr. skipulagslaga nr. 123/2010 þó án skipulagslýsingar og kynningar vinnslutillögu sbr. 3. og 4. mgr. 40. gr. laganna. Tillagan var auglýst 13. desember 2023 með athugasemdafresti til 26. janúar 2024. Þann 29. febrúar 2024 staðfesti bæjarstjórn svör skipulagsnefndar við athugasemdum sem bárust í samræmi við 3. mgr. 41. gr. laganna. Skipulagsstofnun gerði ekki efnislegar athugasemdir við tillöguna og hefur þeim sem gerðu athugasemdir verið send svör sveitarfélagsins ásamt upplýsingum um málskotsrétt.

Svæðisgarðurinn Snæfellsnes boðar til funda í íbúa- og gestastofu Snæfellsness á Breiðabliki laugardaginn 15. júní kl. 15:00 og föstudaginn 28. júní kl. 20:00. Um er að ræða opna fundi þar sem verkefni Svæðisgarðsins verða kynnt og þau til umræðu. Öll velkomin.