Fréttir

Heilsueflingin hefst þriðjudaginn 9. september og verða hópatímar á þriðjudögum og fimmtudögum kl. 12:30 auk þess verða opnir tímar í Átaki kl. 10:20 á miðvikudögum og kl. 9:30 á föstudögum.

Miðvikudaginn 4. september verður blóðbankabíllinn við íþróttamiðstöðina í Stykkishólmi kl. 8:30-12:00.

Alþýðulistamaðurinn Liston kom færandi hendi í Ráðhúsið í Stykkishólmi nú í morgun. Hann færði Stykkishólmsbæ að gjöf verk sem er að hluta unnið úr grjóti sem hrundi úr Súgandisey fyrr í sumar.

Atvinnuráðgjafi Samtaka sveitarfélaga á Vesturlandi verður með skipulagða viðtalstíma í Ráðhúsinu í Stykkishólmi fyrsta mánudag hvers mánaðar í allan vetur.

Starfsmenn leikskólans sátu námskeið á skipulagsdegi 19. ágúst s.l. þar sem viðfangsefnið var ,,Vinátta - eineltisverkefni Barnaheilla" og bangsinn Blær. Eins og áður hefur komið fram í leikskólafréttum þá gaf Kvenfélagið Hringurinn hér í Stykkishólmi okkur námsefnið fyrir eldri börnin s.l. haust og á vormánuðum var gjafafé frá Lionsklúbbi Stykkishólms m.a. notað til að kaupa námsefnið fyrir yngri börnin. Alla tónlistina í verkefninu má finna á Spotify ef leitað er eftir ,,Vinátta". Það voru þær Linda Hrönn Þórisdóttir verkefnastjóri hjá Barnaheill og Kristín Gísladóttir leikskólastjóri Uglukletts í Borgarnesi sem leiðbeindu starfsmönnum leikskólans þennan dag, en Ugluklettur var einn af þeim leikskólum sem prufukenndu námsefnið í upphafi og hefur náð góðum árangri með það.

Á síðasta skólaári sótti Grunnskólinn í Stykkishólmi í samvinnu við leikskólann og tónlistarskólann um styrki til Sprotasjóðs varðandi verkefni á skólaárinu 2019-2020. Sótt var um styrki vegna fjögurra verkefna og fengust styrkir í þrjú þeirra. Leikskólinn er samstarfsaðili í tveimur verkefnanna og nú fer sú vinna að hefjast. Það eru árgangar 2014 og 2015 sem taka þátt, í sitt hvoru verkefninu.

Breska seglskútan Lord Nelson lagðist við bryggju í Stykkishólmi í gærkvöldi og hélt sína leið nú í morgun. Skútan er á hringferð í kringum landið og er önnur af tveimur skútu, sinnar tegundar, í eigu Jubilee Sailing Trust, sem er sérstaklega hönnuð með aðgengi fyrir hreyfihamlaða. Skútan var smíðuð árið 1986 og ber, líkt og höfnin í Stykkishólmi, bláfánann stolt.

Borið hefur á því undanfarið að ungmenni hafi gert sér að leik að stökkva fram af bryggjunni í sjóinn. Vert er að taka fram að þetta er með öllu óheimilt þar sem mikil hætta getur skapast af slíku.

Síðastliðinn fimmtudag sendi Stykkishólmsbær þrjá fulltrúa á vinnufund á vegum Sambands íslenskra sveitarfélaga um íbúasamráð. Fundurinn var haldinn í Kópavogi og var fyrsti liður í nýju verkefni þar sem fjögur sveitarfélög fá aðstoð fagmanna við að beita samráðsaðferðum við ákvarðanatöku.

Á morgun, fimmtudag, fer fram skólasetning Grunnskólans í Stykkishólmi. Athöfnin fer fram kl 10:00 á Amtsbókasafninu. Kennsla hefst svo samkvæmt stundaskrá föstudaginn 23. ágúst kl 08:05.