Fréttir

Sveitarfélagið Stykkishólmur auglýsir 12 nýjar íbúðarhúsalóðir til úthlutunar í Víkurhverfi í Stykkishólmi. Gatnagerð á svæðinu verður lokið um miðjan júní 2024. Um er að ræða lóðir í nýju og fjölskylduvænu hverfi í mikilli nánd við náttúruna. Stykkishólmur er ört vaxandi sveitarfélag sem skartar fjölbreyttum atvinnuvegum og iðandi mannlífi. Samkvæmt húsnæðisáætlun er mikil eftirspurn eftir húsnæði í Stykkishólmi. Áform eru jafnframt um umfangsmikla atvinnuuppbyggingu á svæðinu og því mun fylgja aukin eftirspurn eftir íbúðarhúsnæði. Blómleg ferðaþjónusta býður ótal skemmtilega afþreyingarmöguleika fyrir heimafólk sem og gesti.

Þann 10. febrúar næstkomandi verða liðin 110 ár síðan stofnað var formlegt slökkvilið í Stykkishólmi. Daginn eftir afmælið, þann 11. febrúar, sem jafnframt er 112 dagurinn, mun slökkviliðið aka hring um bæinn kl. 13:00 og taka að því loknu á móti gestum og gangandi á slökkvistöðinni að Nesvegi 1a. Boðið verður upp á kaffi og kökur auk þess sem búnaður slökkviliðsins verður til sýnis. Börn eru sérskalega boðin velkomin, enda oft áhugasöm um störf og búnað slökkviliðsins.

Innra stjórnskipulag hefur verið til umræðu og umfjöllunar í stjórnsýslu sveitarfélagsins um nokkurt skeið. Lagt var upp með það markmið að skýra stjórnskipulag, ábyrgð og verklag hjá sveitarfélaginu og breyta skipulaginu með það fyrir augum að nýta sem best núverandi mannauð. Ráðgjafarsvið KPMG var fengið til aðstoðar við verkefnið og vann það í nánu samráði við sveitarfélagið. Tillaga KPMG að skipulagsbreytingum var lögð fram á bæjarstjórnarfundi í desember sl. og var samþykkt samhljóða.

Börnin í leikskólanum í Stykkishólmi, sérstaklega á Ási og Nesi eru sérlega áhugasöm um nýjan pappírstætara sem við keyptum síðast liðið haust. Þau byrjuðu á því að koma og sjá þegar ég var að tæta niður pappír, þau lágu á gólfinu og horfðu á hvernig pappírinn varð að strimlum í pappírshólfinu. Seinna fengu þau að prófa að setja pappírinn sjálf í tætarann, undir minni umsjón. Þá er gjarnan eitt barnið sem matar tætarann og önnur sem liggja á gólfinu og horfa á hann koma niður í pappírshólfið.

Helstu fréttir eru komnar út. Blaðinu er ætlað að bæta upplýsingaflæði frá sveitarfélaginu og ná til þeirra sem ekki nota tölvur. Stór hluti markhópsins er eldra fólk en blaðið liggur frammi á Höfðaborg og Systraskjóli.

Leitað er að kraftmiklum byggingarfulltrúa fyrir Sveitarfélagið Stykkishólm til að halda utan um byggingarmál og verklegar framkvæmdir. Viðkomandi mun jafnframt sinna starfi byggingarfulltrúa hjá sveitarfélaginu Eyja- og Miklaholtshreppi í gegnum þjónustusamning við Sveitarfélagið Stykkishólm. Starf byggingarfulltrúa er lögbundið, sbr. 8. gr. mannvirkjalaga nr. 160/2010.

Álagningarseðlar fasteignagjalda fyrir árið 2024 verða ekki sendir út á pappír, heldur munu þeir verða aðgengilegir rafrænt í gegnum www.island.is Ef óskað er eftir því að fá álagningaseðil sendan, vinsamlega hafið samband við Þór Örn bæjarritara í 433-8100 eða netfangið thor@stykkisholmur.is

Þann 25. janúar sl. samþykkti bæjarstjórn Stykkishólms tillögu að óverulegri breytingu á deiliskipulagi Reitarvegar vegna stækkunar á byggingarreit fyrir sólskála á Sæmundarreit 8. Húsið var reist árið 1906 og stóð áður við Laugaveg 27b í Reykjavík og nýtur samkvæmt því friðunar vegna aldurs sbr. lög um menningarminjar nr. 80/2012. Í því felst að óheimilt er að raska húsinu, spilla því eða breyta, rífa eða flytja úr stað. Leitað var umsagnar Minjastofnunar, sem veitti jákvæða umsögn.

Árshátíð 1.-6. bekkjar Grunnskólans í Stykkishólmi fer fram fimmtudaginn 1. febrúar nk. kl. 17:00. Undanfarið hafa nemendur æft fjölbreytt og skemmtileg atriði af kappi sem þau sýna svo á sviði í íþróttahúsinu. Er þetta er í fyrsta sinn sem Grunnskólinn nýtir þorrablótssviðið í íþróttahúsinu fyrir sína árshátíð en gera má ráð fyrir að það verði gert til framtíðar, enda mikill lærdómur í því að koma fram á stóru sviði og undirbúa hátíð af þessari stærðargráðu. Miðaverð á árshátíðina er 1000 kr. á gesti en ágóði miðasölu rennur í sjóð menningarferða 5. bekkjar og skíðaferða 7. bekkjar. Ömmur og afar eru velkomin.

Þann 11. september 2023, samþykkti skipulagsnefnd að grenndarkynna óverulega breytingu á deiliskipulagi miðbæjar Stykkishólms vegna fyrihugaðra breytinga á og við Aðalgötu 16 í samræmi 2. mgr. 44. gr. skipulagslaga nr. 123/2010. breytingartillagan felst í niðurfellingu á bílskúrsreit, stækkun og tilfærslu á byggingarreit hússins og aðlögun lóðarmarka samkvæmt því ásamt færslu á stíg aftan við húsið.