Atvinnu- og nýsköpunarnefnd

Dagskrá sjávarútvegsdagsins 2020 lögð fram.

Formaður atvinnu- og nýsköpunarnefndar gerði grein fyrir stöðu fyrirtækja í Stykkishólmi næstu mánuði á grundvelli athugunar bæjarskrifstofu Stykkishólms. Þrengingar eru í ferðaþjónustu vegna COVID19, en gæti farið að rofa til með vorinu. Starfsemi í sjávarútvegi hefur dregist saman að undanförnu vegna þrengri útflutningsmarkaða sem skýrist af áhrifum COVIS19. Á móti vegur að staðan í byggingariðnaði er mjög góð og opinber þjónusta og önnur þjónusta er í góðu jafnvægi.

Fyrir atvinnu- og nýsköpunarnefnd er lögð fram drög að breytingu á lögum um veiðar í fiskveiðilandhelgi Íslands og lögum um stjórn fiskveiða (veiðistjórn grásleppu o.fl.). Í drögunum er m.a. lagt til að ráðherra sé með reglugerð heimilt, að ákveða staðbundin veiðisvæði við grásleppuveiðar, þannig að aðeins geti þar stundað veiðar bátar sem skráðir séu frá byggðarlagi við hlutaðeigandi veiðisvæði og útgerð bátsins eigi þar heimilisfesti. Setja skal skipum aflahlutdeild í aflamarki og krókaaflamarki í grásleppu. Þá er í drögunum gert ráð fyrir að aflahlutdeild einstakra skipa skuli ákveðin á grundvelli veiðireynslu sem fengin hefur verið á leyfi sem skráð er á skipið. Við mat á veiðireynslu skal miða við þrjú bestu veiðitímabil viðkomandi skips frá og með árinu 2013 til og með árinu 2018. Þau skip ein eiga kost á að fá úthlutað aflahlutdeild sem höfðu rétt til leyfis til grásleppuveiða. Í drögunum er lagt til að samanlögð aflahlutdeild fiskiskipa í eigu einstakra aðila, einstaklinga eða lögaðila, eða í eigu tengdra aðila, megi aldrei nema hærra hlutfalli af heildaraflahlutdeild í grásleppu en 2%.

Einnig er lögð fram ályktun SSV um endurskoðun á fyrirkomulagi hrognkelsaveiða.

Valentínus Guðnason, fulltrúi Snæfells, félags smábátaeigenda á Snæfellsnesi, í nefnd Landssambands smábátaeigenda um grásleppuveiðar, mætir til fundarins.

Í 8. gr. laga nr. 116/2016 um stjórn fiskveiða er tiltekið að taka skuli frá 5,3% aflamagns fyrir úthlutun aflamarks til aflahlutdeildarhafa. Þessu frátekna aflamagni skal ráðstafað til ýmissa þarfa, m.a. til að mæta óvæntum áföllum.

Í apríl 2019 skipaði sjávarútvegs- og landbúnaðarráðherra starfshóp til að endurskoða meðferð og ráðstöfun þessara aflaheimilda. Starfshópurinn skilaði skýrslu til ráðherra þann 18. febrúar 2020 þar sem m.a. er lagt til að gert verði upp við handhafa skel- og rækjubóta og þær aflaheimildir renni í varasjóð til að bregðast við óvæntum áföllum í sjávarbyggðum.

Fyrir atvinnu- og nýsköpunarnefnd er lögð fram drög að frumvarpi um breytingu á lögum um stjórn fiskveiða, sem snertir atvinnu- og byggðakvóta o.fl. Þar er m.a. lagt til að heimild ráðherra til að ráðstafa tilteknu aflamagni í skel- og rækjubætur falli brott en að það aflamagn renni í varasjóð vegna óvæntra áfalla. Lagt er til að þetta verði gert í skrefum á tveggja ára tímabili til að veita handhöfum skel- og rækjubóta tíma til aðlögunar.

Formaður nefndarinnar gerir grein fyrir því tjóni sem fyrirtæki á svæðinu sem fengið hafa þessar bætur verða fyrir, verði frumvarpsdrögin óbreytt að lögum. Þessi fyrirtæki hafa árlega fengið bætur í formi aflaheimilda til að milda tjón sem varð þegar heimildir þeirra til skelfiskveiða urðu að engu við eyðingu skelfiskstofnsins.

Með vísan til 5. og 6. tl. fundargerðar nefndarinnar frá 22. maí sl., er lagt fram minnisblað um stofnun félags um rekstur frumkvöðla- og skrifstofuseturs í Stykkishólmi sem 8 fyrirtæki tengd Stykkishólmi standa að. Stefnt er að félagið taki á leigu og endurleigi skrifstofuaðstöðu sem auðveldi fólki að búa og starfa í Stykkishólmi þó að höfuðstöðvar atvinnurekandans séu staðsettar annars staðar.

Með vísan til 5. og 6. tl. fundargerðar nefndarinnar frá 22. maí sl. er rætt um að atvinnu- og nýsköpunarnefnd í samstarfi við bæjarstjórn beitti sér fyrir opnum kynningarfundi um frumkvöðlastarfsemi og hvað þurfi til svo að slík starfsemi geti borið ávöxt.

Lagt var fram minnisblað SSV um nýsköpun atvinnulífs á Vesturlandi. Í minnisblaðinu er lagt til að skipaður verði vinnuhópur til þess að móta stefnu um eflingu nýsköpunar atvinnulífs á Vesturlandi. Í hópnum verði fulltrúar frá atvinnulífi, menntastofnunum, sveitarfélögum og frumkvöðlar.

Lagt fram minnisblað SSV um stöðu áhersluverkefna Sóknaráætlunar Vesturlands á árinu 2020.

Lagðar fram athugasemdir leikskólastjórnenda um bókun Atvinnu- og nýsköpunarnefndar Stykkishólmsbæjar vegna sumarlokunar í Leikskólanum í Stykkishólmi, sbr. fund nefndarinnar 22. maí 2020.

Nýstofnaður Matvælasjóður hefur opnað fyrir umsóknir og er umsóknarfrestur til 21. september nk. Hlutverk Matvælasjóðs er að styrkja þróun og nýsköpun við framleiðslu og vinnslu matvæla úr landbúnaðar- og sjávarafurðum. Markmið sjóðsins er að ná til verkefna á öllum stigum, allt frá hugmyndum til markaðssetningar og hagnýtra rannsókna. Sjóðnum er einnig heimilt að styðja við vöruþróun og markaðssókn á erlendum mörkuðum. Ráðstöfunarfé Matvælasjóðs samanstendur af fjárveitingu af fjárlögum hverju sinni og öðrum tekjum eftir því sem þeim er til að dreifa.

Frekari upplýsingar er að finna á: https://www.stjornarradid.is/verkefni/atvinnuvegir/matvaeli-og-matvaelaoryggi/matvaelasjodur/