Fréttir

Lóðirnar Hjallatangi 36 og Hjallatangi 48 eru hér með auglýstar til úthlutunar í samræmi við reglur Stykkishólmsbæjar um úthlutun á lóðum fyrir íbúðar- og atvinnuhúsnæði og bætast þar með á úthlutunarlista yfir lausar lóðir í Stykkishólmi. Umsóknarfrestur er til 31. desember 2022.

Starfsmenn Íslenska gámafélagsins klára í dag, 21. desember, að bæta nýrri sorptunnu við hvert heimili í sveitarfélaginu sem er merkt fyrir plast.  Í dag verður græna tunnan tæmd og að því loknu breytist hlutvek hennar og í hana fer aðeins pappír og pappi en plastið fer í nýju tunnuna.

Bæjarstjórn samþykkti á síðasta fundi sínum, 8. desember, að veita tímabundinn 90% afsláttur á gatnagerðargjöldumaf byggingum íbúðarhúsnæðis m.v. gjaldskrá 2023 á tilteknum lóðum í Stykkishólmi og að lækkunarheimildin taki gildi eftir samþykkt bæjarstjórnar til og með 31. desember 2023. Skal umsækjandi greiða 75.000 kr. staðfestingargjald fyrir hverja lóð sem sótt er um og er staðfestingargjald óafturkræft verði umsækjanda úthlutað viðkomandi lóð.

Hátíðartónleikar Tónlistarskóla Stykkishólms verða haldnir fimmtudaginn 15. desember kl 18:00 í Stykkishólmskirkju. Nemendur allra kennara sýna afrakstur annarinnar og efnisskráin því mjög fjölbreytt og jólaleg.

Útskriftarhátíð Fjölbrautaskóla Snæfellinga verður haldin föstudaginn 16. desember í hátíðarsal skólans í Grundarfirði. Hátíðin hefst kl.14:00 og að henni lokinni verða kaffiveitingar í boði skólans.

Síðast liðinn föstudag mættu þau Björn Ásgeir og Rebekka Sóley frá Björgunarsveitinni Berserkjum og færðu leikskólanum að gjöf öryggisvesti á nemendur og einnig endurskinsmerki sem börnin fengu með sér heim. Leikskólinn þakkar kærlega fyrir þessa höfðinglegu gjöf sem nýtist vel í skammdeginu.

Notkun á fjórðu tunnunni hefst 21. desember 2022, en hún er ætluð undir plast. Hlutverk grænu tunnunnar breytist og í hana fer aðeins pappír og pappi. Íbúar fá því nýja tunnu, merkta fyrir plast. Eldri tunnurnar verða merktar í vor.

Föstudagskvöldið 16. desember mætir KK í Hólminn og spilar öll sín bestu lög í Vatnasafninu. Tónleikarnir áttu upphaflega að fara fram 25. nóvember sl. en var þá frestað af óviðráðanlegum aðstæðum.

Miðvikudaginn 14. desember eftir hádegi verður opið hús á skrifstofu umhverfis- og skipulagssviðs á 2. hæð í Ráðhúsinu frá kl. 12:00 til kl. 17:00 vegna fyrirhugaðrar deiliskipulagsgerðar fyrir hafnarsvæðið við Skipavík. Kristín Þorleifsdóttir, skipulagsfulltrúi, verður á staðnum og svarar spurningum og tekur við ábendingum.

Í ár hefur Þjónustumiðstöðin með Jóni Beck, verkstjóra, í broddi fylkingar sett upp jólasveinaratleik. Um er að ræða skemmtilega viðbót í jólaskreytingar bæjarins þar sem tækifæri gefst til að arka um Stykkishólm og leita að jólasveinunum sem eru í ýmsum erindagjörðum fyrir jólin og munu birtast hér og þar um bæinn, einn af öðrum. Ratleikurinn hefst mánudaginn 12. desember með komu Stekkjastaurs samkvæmt gamalli hefð og endar með komu Kertasníkis á Aðfangadag 24. desember.