Safna- og menningarmálanefnd

Lagt fram minnisblað bæjarstjóra um eflingu átthagafræðslu (þ.m.t. sögu og menningararfs) og menningartengdrar ferðaþjónustu í Stykkishólmi, en nokkrir dagskrárliðir eru til umfjöllunar á fundinum sem tengjast minnisblaði bæjarstjóra.

Í minnisblaðinu kemur fram að efling átthagafræðslu er ein af aðgerðum í menningarstefnu Vesturlands, bæði hvað varðar eflingu átthagafræðslu í leik- og grunnskólum sem og þróun kennsluefnis í átthagafræðslu fyrir alla aldurshópa. Í þessum anda er vert að huga að því að efla átthagafræðslu fyrir íbúa Stykkishólmsbæjar þannig að hún verði aukin með aðgengilegu fræðsluefni og merkingum m.a. um minjar og sögu, byggingarlist, náttúrufar og kennileiti í bæjarlandinu, en þó einkum við göngustíga, gömul hús og á útivistarsvæðum. Gera má jafnframt ráð fyrir því að fræðslan verði á íslensku og ensku og því nýtist í tengslum við menningartengda ferðaþjónustu, en menningartengd ferðaþjónusta nær yfir ýmiss konar afþreyingu í ferðaþjónustu sem byggist á sögu og menningu. Hafa ber jafnframt í huga stýringu á ferðmönnum í þessu sambandi.

Á sama tíma er vert að virkja einstaklinga, félagasamtök og fyrirtæki í þessu sambandi í von um frumkvæði þeirra í þessu sambandi, sem mun án efa bæta og fegra bæjarumhverfið, eftir atvikum í samstarfi við Stykkishólmsbæ, og þannig hvetja til frumkvæðis þeirra við að gera hærra undir höfði með sýnilegum hætti þeirri söguarfleifð sem hér er í Stykkishólmi.

Lagður er fram hugmyndalisti að menningartengum viðburðum þar sem meðal annars eru hugmyndir sem tengjast menningartengdri ferðaþjónustu. Þá eru lagðar fram tillögur að verkefnum sem hægt er að leggja áherslu á, svo sem skilti við gömlu húsin og staði, átthagafræðslu ungmenna, örnefni og fornminjar í Stykkishólmi og söguskilti

Í þessu sambandi eru lagðir jafnframt fram gamlir upplýsingabæklingar m.a. um gömlu húsin í Stykkishólmi, en í því sambandi mun bæjarstjóri kynna hugmyndir um að koma þessum eða svipuðum upplýsingum fram með rafrænum hætti auk þess að setja upp skilti fyrir framan gömlu húsin í bænum með upplýsingum um þau.

Á 108. fundi nefndarinnar fór formaður yfir tilgang minnisblaðsins, en uppruna minnisblaðsins má rekja til ábendinga frá íbúa og minnispunkta bæjarstjóra í kjölfar umræðna og samtala við íbúa um hin ýmsu málefni síðasta vetur. Tilgangur minnisblaðsins er m.a. að vekja athygli nefndarmanna á þeim tækifærum sem standa til boða hér í Stykkishólmi, m.a. í menningarmálum, og þá að hvetja til umræðu og frumkvæðis í þessum efnum. Nú þegar liggja fyrir safna- og menningarmálanefnd nokkur mál sem byggja á umræddu minnisblaði, beint eða óbeint, t.d. lagningu göngustíga ásamt fræðsluskiltum við Búðanes og Hjallatanga þar sem unnið verður með þjóðminjaverndarsvæði á svæðinu, upplýsingaskilti um The Secret Life of Walter Mitty og upplýsinga- og fræðsluskilti um veðurathuganir í Stykkishólmi fyrir framan núverandi veðurathuganarstöð. Þá liggja jafnframt fyrir undir þessum lið hugmyndir að öðrum verkefnum sem hægt er að leggja áherslu á, svo sem skilti við sum gömlu húsanna og aðra staði, svo sem við örnefni og/eða fornminjar í Stykkishólmi sem og önnur söguskilti. Allt eru þetta verkefni sem hægt er jafnframt að leggja til grundvallar við styrkumsóknir bæjarins.

Safna- og menningarmálanefnd vísaði málinu til frekari vinnslu í nefndinna og var sammála um að vinna það áfram, skipuleggja og ákveða markmið þess og umfang.

Lögð fram skýrsla stýrihóps um myndun framtíðarsýnar fyrir bæjarhátíðir í Stykkishólmi, en á 603. fundi bæjarráðs vísaði bæjarráð skýrslunni til umsagnar í safna- og menningarmálanefnd. Forsaga málsins er sú að bæjarstjórn skipaði í janúar 2019 stýrihóp til að móta stefnu um bæjarhátíðir í Stykkishólmi og aðkomu bæjarins að þeim. Helsta hlutverk hópsins var að kanna viðhorf bæjarbúa til slíkra hátíða, meta samfélagsleg áhrif þeirra, efnahagslegan ávinning og þá arfleifð sem þær skila samfélaginu. Auk þess að gera tillögu að framtíðarfyrirkomulagi/framtíðarstefnu slíkra hátíða, greina og móta markmið þeirra og útfæra aðkomu bæjarins að þeim.

Á 108. fundi Safna- og menningarmálanefndar kom forstöðumaður Amtsbókasafnsins í Stykkishólmi kom til fundar við nefndina og gerði grein fyrir greinagerð sinni um ljósmyndasafn Stykkishólms, framtíð og möguleika.

Safna- og menningarmálanefnd taldi rétt að óska eftir tilboðum frá Jóhanni Ísberg í samræmi við greinargerð forstöðumanns og jafnframt að kanna kostnað hjá hýsingaraðila bæjarins við hýsingu á Ljósmyndasafninu. Þá kom fram sú tillaga á fundinum, sem tekin verður til frekari umræðu nú, að leggja til við bæjarstjórn að skipa þriggja manna starfshóp um framtíð safnsins og hlutverk þess. Forstöðumaður Amtsbókasafns, forstöðumaður safna og Anna Melsteð lýstu á fundinum m.a. yfir áhuga á því að starfa í hópnum.

Hjördís Pálsdóttir, forstöðumaður Norska Hússins, kom til fundar við Safna- og menningarmálanefnd á síðasta fundi nefndarinnar og gerði grein fyrir drögum að söfnunar- og sýningarstefnu fyrir árin 2020-2025. Nefndin þakkaði Hjördísi fyrir framlögð drög að söfnunar- og sýningarstefnu og yfirferð hennar á þeim. Þá samþykkti nefndin að fara betur yfir stefnuna á næsta fundi.

Menningarstefna Stykkishólmsbæjar frá árinu 2016 er lögð fram, en samkvæmt Menningarstefnu Stykkishólmsbæjar skal safna- og menningarmálanefnd ár hvert endurskoða stefnuna.

Lögð fram drög að gjaldskrá Stykkishólmsbæjar 2020, sem vísað var til seinni umræðu í bæjarstjórn á síðasta bæjarstjórnarfundi, en gjaldskráin tekur mið af fyrirliggjandi forsendum og markmiðum við gerð fjárhagsáætlunar Stykkishólmsbæjar 2020-2023. Þá tekur gjaldskráin mið af yfirlýsingu frá Sambandi íslenskra sveitarfélaga í tengslum við lífskjarasamninga 2019-2022 þar sem mælst var til þess að sveitarfélögin hækki gjaldskrár sínar á árinu 2020 um 2,5% að hámarki.

Fyrir safna- og menningarmálanefnd er lögð fram fjárhagsáætlanir safna í Stykkishólmsbæ og fjárhagsáætlun Stykkishólmsbæjar 2020 ásamt þriggja ára fjárhagsáætlun 2021-2023 sem samþykkt var eftir fyrri umræðu í bæjarstjórn.