Félagsheimilið Skjöldur

Lagt fram til kynningar.

Bæjarráð telur mikilvægt að boðað verði til eigendafundar við fyrsta tækifæri með sameigendum að Félagsheimilinu Skildi, þ.e. Kvenfélaginu Björk (5%) og Ungmennafélaginu Helgafell (15%), varðandi forgangsröðun framkvæmda og viðhalds á húsinu líkt og til hefur staðið eftir að fundi sem áætlaður var í júní sl. var frestað. Á þeim eigendafundi er mikilvægt að boða jafnframt fulltrúa í dreifbýlisráði, sem sitja fyrir hönd sveitarfélagsins í stjórn Félagsheimilisins Skjaldar ásamt því að vera málsvari íbúa dreifbýlisins gagnvart bæjarstjórn, í samræmi við áherslur samstarfsnefndar um sameiningu sveitarfélaganna.

Bæjarráð leggur jafnframt áherslu á að sveitarfélagið taki frumkvæði, líkt og það gerði síðastliðið vor þegar farið var í viðgerðir á salernum til bráðabirgða, og tryggi að viðhald sé viðunandi á húsnæðinu. Í þessu sambandi samþykkir bæjarráð að ráðstafað verði fjármunum til viðhaldsframkvæmda á húsnæðinu á þessu ári, náist um það sátt á eigendafundi og dreifbýlisráði.

Bæjarráð felur bæjarstjóra að taka málefni Skjaldar og viðhaldsþörf að nýju upp við dreifbýlisráð/hússtjórn Skjaldar, ásamt starfsfólki sveitarfélagsins, með tilliti til forgangsröðunar á viðhaldi húsnæðisins með það að markmiði að tímasetja nauðsynlegar viðhaldsframkvæmdir þannig að húsnæðið verði tilbúið til notkunar í síðasta lagi 1. júní nk.

Bæjarráð leggur til við dreifbýlisráð/hússtjórn að hússtjórn útfæri og auglýsi eftir umsjónarmanni með húsnæði Skjaldar næsta sumar og vísar kostnaðarhlutdeild sveitarfélagsins vegna starfsmanns til næsta viðauka.

Dreifbýlisráð/hússstjórn samþykkir fyrir sitt leyti að hefja viðhaldsframkvæmdir á klósettum í samræmi við fyrirliggjandi teikningu og er formanni dreifbýlisráðs falið, fyrir hönd ráðsins og annarra eigenda (hússtjórnar), að fylgja málinu eftir fyrir þeirra hönd, taka nauðsynlegar ákvarðanir og halda þeim upplýstum um framvindu þess. Kostnaður af framkvæmdinni skiptist eftir eigendahlut samkvæmt eigendasamningi.

Formanni dreifbýlisráðs falið, fyrir hönd hússtjórnar, að leggja fram tillögu að umsjónarmanni eða fyrirkomulagi við bæjarstjóra í samræmi við umræður á fundinum.

Dreifbýlisráð fagnar þeirri uppbyggingu og þeim endurbótum sem eru hafnar af hálfu sveitarfélagsins á Félagsheimilinu Skildi og samþykkir þær tillögur sem liggja fyrir um þau áform. Ráðið telur að með endurbótunum skapist forsendur til þess að geta nýtt þau tækifæri sem húsið býður upp á og glæða húsið aftur lífi með fjölbreyttu menningar- og viðburðastarfi.

Fulltrúar eigenda félagsheimilisins veita dreifbýlisráði umboð til að vinna að gerð tillagna varðandi umsjón með Félagsheimilinu fyrir sumarið 2025.
Dreifbýlisráð hvetur sveitarfélagið að halda áfram endurbótum á félagsheimilinu á næsta ári og fagnar þeirri vinnu sem hefur þegar farið fram.