Safna- og menningarmálanefnd

Lagt fram minnisblað bæjarstjóra vegna styrkveitingar Stykkishólmsbæjar að fjárhæð kr. 24.950.000. Styrkurinn er veittur til deiliskipulagsgerðar fyrir Súgandisey sem mun tryggja heilstæða sýn á þróun eyjunnar. Samhliða skipulagsáætlun mun vera unnið að útsýnissvæði í samræmi við vinningstillögu úr samkeppni, sem haldin var í samvinnu við Félag íslenskra landslagsarkitekta (FÍLA), og ber heitið Fjöregg, en Fjöreggið er útsýnisskúlptúr, útsýnispallur, upplifunar- og áningastaður allt í senn.

Þá eru jafnframt lögð fram önnur gögn vegna málsins til upprifjunar, sem áður hefur verið kynnt safna- og menningarmálanefnd.

Lögð fram gögn um svæðisgarðinn Snæfellsnes og svæðisskipulag Snæfelsness, en nefndarmönnum er einnig bent á að lesa má um Svæðisgarðinn á heimasíðu hans: https://www.snaefellsnes.is/.

Í svæðisskipulaginu, sem ber yfirskriftina "Andi Snæfellsness - Auðlind til sóknar" er sett fram stefna um byggðar- og atvinnuþróun á Snæfellsnesi. Skipulagið miðar að því að atvinnulífið, þekkingargeirinn og samfélagið nýti sér í auknum mæli náttúru og menningarauð Snæfellsness og að skipulag og mótun byggðar og umhverfis taki mið af honum. Sérstök athygli er vakin á umfjöllun í svæðisskipulagi um menningarauð og umfjöllun um menningarlíf og menningararfi (U5) í svæðisskipulagi í þessu sambandi. Svæðisgarðurinn var stofnaður í þeim tilgangi að vinna að framgangi svæðisskipulagsins með það að markmiði að efla samfélagið, vinna sameiginlega að því að bæta lífsgæði og lífkjör og auka upplifun og vellíðan íbúa og gesta.

Í samræmi við fyrri afgreiðslu safna- og menningarmálanefnd kemur framkvæmdastjóri Svæðisgarðsins til fundar við nefndina til að gera nánari grein fyrir starfsemi Svæðisgarðsins.

Á 396. fundi bæjarstjórnar Stykkishólmsbæjar samþykkti bæjarstjórn Stykkishólmsbæjar samning við Félag atvinnulífs í Stykkishólmi um samfélagslega viðspyrnu og eflingu samfélagsins, sem hafði áður hlotið umfjöllun í safna- og menningarmálanefnd.

Á fund nefndarinnar kemur fulltrúi Félag atvinnulífs í Stykkishólmi og gerir grein fyrir þeim menningarviðburðum sem áætlað er að halda á árinu samkvæmt samningnum.

Lögð fram söfnunar- og sýningarstefna 2021-2026 ásamt gögnum sem tengjast vinnu við nýja grunnsýningu í safninu.

Hjördís Pálsdóttir, forstöðumaður Norska hússins, gerir nefndinni nánari grein fyrir þeirri vinnu sem fram hefur farið varðandi nýja grunnsýningu safnsins.

Lagt fram minnisblað bæjarstjóra varðandi framtíðaráform Vatnasafns, sem unnið var til upplýsinga fyrir bæjarráð, ásamt bréfi frá James Lingwood sem sent var í kjölfar fundar hans með safna- og menningarmálanefnd.

Menningarstefna Stykkishólmsbæjar 2019-2022 er lögð fram og tekin til umfjöllunar, en markmið menningarstefnunnar er að leggja rækt við og styðja menningarlega vitund íbúa og þar með innviði samfélagsins.

Lögð fram skýrsla starfshóps um framtíð ljósmyndasafns Stykkishólms. Bæjarráð þakkaði, á 620. fundi sínum, starfshóponum fyrir vel unna skýrslu og samþykkti að boða starfshópinn á fund bæjarráðs til þess kynna niðurstöður sínar.