Afgreiðslufundur byggingarfulltrúa

Sótt er um parhús við Imbuvík 1/1a. Steyptir sökklar og plata og timbureiningar, sjá nánari upplýsingar á aðaluppdráttum.

Sótt er um parhús við Imbuvík 3/3a. Steyptir sökklar og plata og timbureiningar, sjá nánar á aðaluppdráttum.

Lögð fram umsókn Borgar, frímúrarastúku, um byggingarleyfi til að bæta við stiga og lyftuhúsi við norðurgafl Smiðjustígs 3 þannig að aðgengi að efri hæð hússins standist reglur um algilda hönnun.



Samkvæmt fyrirliggjandi gögnum er um að ræða steinsteypta 75,3 m² viðbyggingu á tveimur hæðum með flötu viðsnúnu steyptu þaki. Stiginn verður steyptur og lyftan verður með hjólastólaaðgengi. Salernisaðstaða verður einnig endurnýjuð. Önnur rými haldast óbreytt.



Þar sem húsið er á ódeiliskipulögðu svæði, vísaði byggingarfulltrúi málinu til skipulagsnefndar sem samþykkti, á 23. fundi sínum, að grenndarkynna byggingaráformin sbr. framlagðar teikningar í samræmi við 1. mgr. 44. gr. skipulagslaga nr. 123/2010 að undangenginni samþykkt bæjarstjórnar á breytingu á lóðarmörkum (sbr. mál 2407005). Grenndarkynna skal fyrir meðeigendum Smiðjustígs 3 og lóðarhöfum Smiðjustígs 4.

Lagðar eru fram teikningar af breytingu hluta bílskúrs í íbúð dags. 24.06.2024.



Á 22. fundi skipulagsnefndar 5. júní sl var tekin fyrir fyrirspurn Snjólfs Björnssonar og Bjargar Gunnarsdóttur, lóðarhafa Sundabakka 1a, um afstöðu nefndarinnar hvað varðar breytingu á hluta bílskúrs í íbúðarhúsnæði. Umrædd lóð er á ódeiliskipulögðu svæði. Skipulagsnefnd tók ágætlega í erindið og taldi breytinguna samræmast almennri landnotkun, byggðamynstri og þéttleika byggðar í þessum bæjarhluta.



Nefndin óskaði eftir að formlegri umsókn fylgi tilskilin grenndarkynningargögn s.s. lýsing á áformunum og grunnteikning.



Þann 23. júní sl samþykkti bæjarráð að grenndarkynna áformin berist formleg umsókn ásamt umbeðnum gögnum.



Grenndarkynningu lauk 24. september og bárust engar athugasemdir.