Stofnfundur Matarklasa Snæfellsness
Þann 23. janúar nk. verður haldin stofnfundur Matarklasa Snæfellsness í Bæringsstofu, Grundarfirði, frá kl. 15 til 17.
Eins og íbúar Snæfellsness vita þá er svæðið ríkt frá náttúrunnar hendi þegar kemur að mat og endurspeglast það í starfsemi á svæðinu. Hér eru stöndug sjávarútvegsfyrirtæki, blómlegur landbúnaður og hágæða veitingastaðir sem bjóða upp á mat úr héraði. Þessi áhersla á mat kom einnig sterklega í ljós við gerð svæðisskipulags Snæfellsness og í vinnu við Svæðisgarðinn Snæfellsnes. Það er skýr vilji til að matvælaframleiðsla fari fram í beinum og nánum tengslum við náttúruna og með sjálfbæra nýtingu auðlinda að leiðarljósi. Lögð er áhersla á nýsköpun, auknu aðgengi að hráefni og matvælum af Snæfellsnesi og að efla þekkingu á matvælaframleiðslu, menningu og hefðum.
Á sama tíma og markmiðið er að gera Snæfellsnes að áfangastað fyrir sælkera þá er stefnan að auka aðgengi íbúana að snæfellsku hráefni.
Matarklasinn verður vettvangur fyrir samstarf í kringum þessi markmið og einnig tækifæri fyrir hagsmunaaðila að hittast, deila þekkingu og koma fram með hugmyndir um hvernig hægt er að efla og styrkja matartengda starfsemi á svæðinu.
Ef þú vinnur við frumframleiðslu á mat ? hvort sem það er sjávarútvegur eða landbúnaður, rekur veitingastað, mötuneyti eða kaffihús, vinnur við matvælaframleiðslu á einn eða annan hátt, kennslu eða menningatengda starfsemi og/eða hefur mikinn áhuga á þessum málefnum þá endilega komdu á stofnfund matarklasans.
Ef þig vantar frekari upplýsingar ekki hika við að hafa samband: elin@snaefellsnes.is
Dagskrá
15:00-15:15 Kynning á matarverkefnum Svæðisgarðsins og framtíðarsýn
15:15-16:00 Umræður. Fundargestir fá tækifæri til að hafa áhrif á vinnuna framundan og stefnuna.
16:00-16:20 Kynning á Sælkeraferðum um Snæfellsnes, verkefni styrkt af Matarauði Íslands. Útskýrt verður fyrir hverja þetta verkefnið er ætlað og hvaða leikreglur verða hafðar til hliðsjónar við framkvæmd þessa verkefnis.
16:20- 16:45 Umræða um Sælkeraferðir.
16:45- 17:00 Næstu skref
