Hvorki tilefni til að herða né slaka á aðgerðum

Viðbragðsteymi Stykkishólmsbæjar fundaði með aðgerðarstjórn almannavarna á Vesturlandi í dag í ljósi vaxandi smita COVID-19 síðustu daga. 

Síðasta sólarhring hafa greinst tvö ný smit tengd Stykkishólmi, annar einstaklingurinn var í sóttkví í Stykkishólmi en hinn er með lögskráningu í Stykkishólmi en dvelur í Reykjavík. Í Stykkishólmi eru nú 11 skráðir með staðfest smit og í einangrun, þar af eru tveir sem taka út einangrun í Reykjavík. Í dag fóru 11 einstaklingar í sýnatöku og er niðurstöðu þeirra sýna að vænta á morgun.  

VARÚÐARRÁÐSTAFANIR ENN Í GILDI - PERSÓNUBUNDNAR SMITVARNIR STERKASTA VÖRNIN

Niðurstaða fundarins var sú að hvorki þótti tilefni til að herða né slaka á aðgerðum. Þær varúðarráðstafanir sem gripið var til fyrr í vikunni þóttu hafa skilað góðum árangri og full ástæða til að halda áfram á þeirri braut næstu daga. Áður auglýstar varúðarráðstafanir eru því enn í gildi, þ.m.t. hólfaskipting í skólastofnunum og heimsóknarbann á dvalarheimili aldraðra.

Staðan verður endurmetin á mánudaginn. 

Einnig er heimsóknarbann á legudeild Heilbrigðisstofnunar Vesturland (HVE) í Stykkishólmi. Þá er HVE í Stykkishólmi með í skoðun hjá sér að opna sérstaka upplýsingasíðu á samfélagsmiðlum til koma upplýsingum á framfæri við íbúa.

Íbúar eru áfram hvattir til að huga vel að persónubundnum smitvörnum, hafa hægt um sig og fylgjast grannt með þróun mála.

RÁÐSTAFANIR VEGNA COVID-19

Eftirfarandi varúðarráðstafanir eru í gildi í Stykkishólmi:  

• Grunnskólinn í Stykkishólmi hefur tekið upp hólfaskiptingu líkt og gert var í vor. Skólinn opnar kl. 08:10
• Leikskólinn í Stykkishólmi hefur einnig tekið upp hólfaskiptingu, en starfstími leikskóla helst óbreyttur.
• Tónlistaskóli Stykkishólms heldur óbreyttu námi fyrir börn á grunnskólaaldri en hefur tekið upp fjarkennslu fyrir eldri nemendur. 
• Dvalarheimili aldraðra hefur tímabundið lokað fyrir heimsóknir, en það á einnig við um búseturéttaríbúðir.
• Heilbrigðisstofnun Vesturlands lokar tímabundið fyrir heimsóknir á legudeild í Stykkishólmi. 
• Íþróttamiðstöð/sundlaug Stykkishólmsbæjar leggur aukna áherslu á sóttvarnir.
• Amtsbókasafn Stykkishólms leggur aukna áhersla á sóttvarnir. Aðalinngangur er lokaður, en gengið er inn að aftan.
• Ráðhús Stykkishólmsbæjar og aðrar stofnanir loka tímabundið fyrir gestum.
• Félagsmiðstöðin X-ið hefur lagt niður starfsemi þar til línur skýrast.
• Snæfell hefur tímabundið lagt niður æfingar.

Íbúum er bent á að fylgjast vel með tilkynningum frá skólum og öðrum stofnunum Stykkishólmsbæjar um helgina. 

Nánari upplýsingar má annars finna á covid.is.