Fjármála- og skrifstofustjóri

Hlusta

Sveitarfélagið Stykkishólmur leitar að kraftmiklum fjármála- og skrifstofustjóra með mikla samskiptafærni. Viðkomandi þarf að vera skipulagður, vandaður í vinnubrögðum ásamt því að hafa ríkan vilja til að taka þátt í að efla innra og ytra starf og þjónustu sveitarfélagsins.

Fjármála- og skrifstofustjóri stýrir fjármálum sveitarfélagsins og er yfirmaður á bæjarskrifstofu. Starfið er mjög fjölbreytt og tekur skrifstofu- og fjármálastjóri virkan þátt í stjórnun og stefnumótun sveitarfélagsins ásamt því að leiða margþætt verkefni er varða stjórnsýslu og fjármál á tímum framfara og þróunar.

Skrifstofu- og fjármálastjóri er staðgengill bæjarstjóra.

Helstu verkefni og ábyrgð

Fagleg forysta og verkstjórn daglegra verkefna bæjarskrifstofu
Yfirmaður fjármála og ábyrgð á umsýslu fjármála og bókhalds
Umsjón með fjárhagsáætlanagerð, frávikagreiningum, fjárhagslegum úttektum og kostnaðareftirliti sem og yfirferð samþykktra reglna sveitarfélagsins og gjaldskráa
Ábyrgð á vinnu við ársreikninga og gerð rekstrar-, launa-, starfs-, og fjárhagsáætlana, ásamt eftirliti með framgangi þeirra
Þátttaka í stefnumótun og nýsköpun á sviði fjármála og fjárreiða
Aðstoð við undirbúning funda og viðvera á bæjarráðs- og bæjarstjórnarfundum, umsýsla og ritun fundargerða og eftirfylgni með ýmsum málum
Yfirumsjón með mannauðs- og kjaramálum í samvinnu með mannauðs- og launafulltrúa, þ.m.t. upplýsingagjöf til starfsmanna og stjórnenda vegna launamála, samninga og verklagsreglna, og samskipti vegna kjarasamninga og túlkun á þeim
Ábyrgð á innkaupum, aðkoma að samningagerð og önnur fjármálatengd verkefni
Yfirumsjón með skjalavörslu sveitarfélagsins og stofnana þess
Samskipti við forstöðumenn og íbúa vegna erinda er snúa að fjármálum og annarri þjónustu bæjarfélagins, ásamt samskiptum við ýmsa opinbera aðila
Ábyrgð á stjórnsýslu, þróunarstarfi og nýsköpun í stjórnsýslu
Staðgengill bæjarstjóra

Menntunar- og hæfniskröfur

Háskólamenntun sem nýtist í starfi, t.d. á sviði viðskipta- eða hagfræði
Þekking og farsæl reynsla af fjármálastjórn og rekstri, þ.m.t. áætlanagerð
Farsæl reynsla af stjórnun
Yfirgripsmikil þekking á málefnum sveitarfélaga og reynsla á opinberri stjórnsýslu
Mjög góð þekking á reikningshaldi, uppgjörum og áætlanagerð
Haldgóð reynsla af sambærilegu starfi
Góð tölvukunnátta
Kunnátta í Navision bókhaldskerfum er kostur
Leiðtogahæfileikar, frumkvæði, skipulagshæfileikar og drifkraftur í starfi
Mikil hæfni í mannlegum samskiptum og góð félagsleg færni
Samviskusemi og nákvæmni í starfi
Góð hæfni í íslensku og ensku í ræðu og riti

Með umsókn skal fylgja greinargóð starfsferilsskrá og kynningarbréf þar sem gerð er grein fyrir ástæðu umsóknar og rökstuðningur fyrir hæfni viðkomandi í starfið.

Launakjör eru samkvæmt kjarasamningi Launanefndar Sambands íslenskra sveitarfélaga og viðkomandi stéttarfélags.

Áhugasamir einstaklingar, óháð kyni, eru hvattir til að sækja um starfið.

Umsóknarfrestur er til og með 1. júní 2024.

Nánari upplýsingar um starfið veitir: Jakob Björgvin Sigríðarson Jakobsson, bæjarstjóri, jakob@stykkisholmur.is, S: 433 8100.

Öllum umsóknum verður svarað þegar ákvörðun um ráðningu liggur fyrir.

Um sveitarfélagið

Sveitarfélagið Stykkishólmur er á norðanverðu Snæfellsnesi og dregur nafn sitt af þéttbýlinu Stykkishólmi sem stendur við Breiðafjörð og er rómað fyrir einstaklega fallegt bæjarstæði. Um 1.330 manns búa í sveitafélaginu sem er innan við tveggja klukkustunda akstursfjarlægð frá höfuðborgarsvæðinu. Þjónustustig er gott í Stykkishólmi og státar bæjarfélagið af ríkulegu íþrótta- og tómstundastarfi fyrir fólk á öllum aldri og rótgrónum mennta- og menningarstofnunum. Alla helstu grunnþjónustu er að finna á svæðinu, m.a. leikskóla, grunnskóla, tónlistarskóla og framhaldsskóla, öflugt íþróttastarf, heilsugæslu, bókasafn, lágvöruverslun og margt fleira. Þá eru atvinnuvegir fjölbreyttir og samfélagið fjölskylduvænt. Blómleg ferðaþjónusta býður ótal skemmtilega afþreyingarmöguleika fyrir heimafólk sem og gesti. Í sveitarfélaginu er fjölskrúðug og falleg náttúra og gott mannlíf. Það eru spennandi tímar og mikil uppbygging framundan í sveitarfélaginu. Aðstaða er fyrir störf óháð staðsetningu, t.d. fyrir maka.