Beiðni og athugasemdir varðandi skipulagsmál og framkvæmdir á svæði við Ytri höfða í Stykkishólmi (Sæmundarreitur)

Bæjarráð bendir á að nýtt deiliskipulag tók gildi fyrir svæðið á árinu 2018, sem þá hafði verið í undirbúningi og vinnslu í langan tíma. Markmið skipulagsins og skilmála þess er að leggja grunn að fögru og vel byggðu umhverfi í góðum tengslum við strandlengjuna, til prýði fyrir bæinn, og var leitast við að raða byggingum og gefa þeim form, þannig að þær myndi samræmda byggingamassa, heillegar götumyndir, götu- og garðrými.

Á árinu 2020 var gerð breyting á deiliskipulaginu þar sem gerð var breyting að aðskomu að Sæmundarreit þannig að í stað aðkomu norðaustan við lóð Reitarvegs 12 er gert ráð fyrir nýrri aðkomu milli lóða 2 og 4 við Sæmundarreit. Einnig var gatan stytt og gerð að vistgötu. Hvað lóðarhafa við Sæmundarreit 5a varðar þá var jafnframt gerð breyting á aðkomu að lóðinni við skipulagsbreytinguna, en aðkoma að lóð Sæmundarreitar 5a var gerð að akfærum göngustíg.

Bæjarráð bendir jafnframt á að á árinu 2020 fóru fram gatnaframkvæmdir og lagnavinna, sem byggðar voru á fyrirliggjandi skipulagi og verkteikningum. Í þeirri vinnu var ekki gert ráð fyrir breyttri notkun á Sæmundarreit 5a. Ef fallist verður að umbeðnar hugmyndir að breytingu á deiliskipulagi felur það í sér grundvallar breytingu á forsendum bæjarins og kostnað í samræmi við auknar kröfur til gatnagerðar, lagnavinnu og aðkomu.

Bæjarráð telur, m.a. á grundvelli framangreinds, að ekki séu fyrir hendi forsendur til þess að taka jákvætt í erindið.