Framkvæmdir við körfuboltavöll á skólalóð

Framkvæmdir við nýjan körfuboltavöll á lóð Grunnskólans í Stykkishólmi hófust í gær, 6. júlí, þegar félagar í Umf. Snæfell mættu til að taka niður það sem eftir stóð af hreystivellinum, en þar mun rísa nýr og glæsilegur körfuboltavöllur.

Uppbygging körfuboltavallarins er samstarfsverkefni Stykkishólmsbæjar og Umf. Snæfells í anda samstarfs beggja aðila um að efla íþróttastarf í Stykkishólmi. Um er að ræða þriðja áfanga uppbyggingar á skólalóðinni sem hófst árið 2019. Völlurinn verður blár og rauður á litinn, 28x 15m að stærð, á honum verða 2 stórar körfur og 4 minni sem hægt er að spila á þvert á hvorum helmingi vallarins. Gert er ráð fyrir að völlurinn verði klár fyrir haustið.

Á hreystivellinum var gervigrasteppi sem búið er að taka upp og íbúum stendur til boða að hirða.  Áhugasamir gervigrasunnendur geta því mætt á svæðið, skorið sér bút af teppinu og tekið með heim. Teppið verður ekki hreyft af höndum bæjarins fyrr en föstudaginn 9. júlí, þá verður efnið fjarlægt. Fyrstur kemur fyrstur fær.