Stakur viðburður

30.09.2019 09:00

Tónleikar í Stykkishólmskirkju

Sunnudaginn 6. október munu þær Ingibjörg Fríða Helgadóttir og Ingibjörg Ýr Skarphéðinsdóttir halda tónleika í Stykkishólmskirkju sem ber yfirskriftina konan í speglinum.

Þrjár Ingibjargir renna saman í eina konu, einn hugarheim, einn hljóm.

Tónleikaupplifun þar sem ljóð Ingibjargar Haraldsdóttur fléttast inn í töfrandi hljóðheim Ingibjarga. Þar hljóma langspil, klarinett, spiladósir, kalimbur, píanó, rafhljóð, harmoníum og raddir.

Konan í speglinum er sönglagabálkur með nýjum lögum við ljóð Ingibjargar Haraldsdóttur. Ingibjörg Fríða og Ingibjörg Ýr hafa unnið að tónlistinni síðustu ár og hlutu nú í ár listamannalaun til að fullvinna tónlistina og gera klára til flutnings og upptöku á plötu. Þær hafa flutt tónlistina við ýmis tækifæri og á tónleikum í Reykjavík, Þingvöllum, Siglufirði og á Egilsstöðum.

Ingibjörg Fríða á ættir að rekja í Stykkishólm og munu þær því dvelja í bænum vikuna fyrir tónleika, semja og æfa þar og bjóða bæjarbúum að hlýða á afraksturinn á tónleikum í Stykkishólmskirkju, sunnudaginn 6. október klukkan 16:00. Aðgangur er ókeypis.

Tónleikarnir eru styrktir af launasjóði listamanna